İnnovasiya və Rəqəmsal İnkişaf Agentliyində diqqətçəkən media reklamı: 1.8 milyon necə və kimlərə ayrılıb?

İnnovasiya və Rəqəmsal İnkişaf Agentliyi (İRİA) 10 gün aralıqla təxminən iki eyni məzmunlu tender keçirərək, onların ikisini də eyni şirkətə verib. 

Mia.az-ın məlumatına görə, Tribunainfo.az xəbər verir ki, söhbət “360 dərəcə marketinq – Media yerləşdirilməsi xidmətlərinin satın alınması” və “Tədbirlərin təşkili xidmətlərinin satın alınması” tenderlərindənm gedir.

Qeyd edək ki, hər iki tenderin qalibi “ELVİ.M.M. SERVİCES GROUP” MMC olub. Birinci tender üzrə MMC ilə 1.844.192,5 manatlıq müqavilə imzalanıb. Həmin müqaviləyə əsasən sözügedən şirkət ATV, Xəzər, İTV, ARB, Space, AZTV kimi televiziya kanallarında rəqəmsal hökumət fəaliyyəti çərçivəsində məlumatların yerləşdirilməsini həyata keçirməlidir.

Bu ilin 12 noyabrında reallaşmış və “Elvi.M.M. Services Group” MMC-nin qalibi olduğu tender üzrə isə 912 449 manatlıq müqavilə bağlanılıb. Bu da 10 gün içində eyni şirkətlə toplam 3 milyon manata yaxın məbləğli müqavilə deməkdir.

Bəs, bu şirkət kimindir, daha hansı tenderlərin qalibi olub?

Tribunainfo.az-ın “Elvi.M.M. Services Group” MMC ilə bağlı apardığı araşdırma nəticəsində məlum olub ki, bu şirkəti “tender kralı” hesab etmək olar. Həmçinin bu şirkəti Sabirabadda yol çəkən, Bakıda bina tikən, Gədəbəydə yaşıllaşdırma işi görmək də mümkündür. Bir sözlə, hər işlə məşğul olan çoxprofilli şirkətdir.

Məsələn, MMC ötən il Sabirabad şəhərində abadlıq işlərinin aparılması tenderinin qalibi olub. Bunun üçün 261 791 manat pul alıb.

İndi isə başqa bir maraqlı məsələyə diqqət edək.

Mia.az-ın məlumatına görə, Tribunainfo.az açıq mənbələrdən müəyyən edib ki, “Elvi.M.M. Services Group” MMC “RASH.M.M.TRADE AND SERVICES-2020” MMC və “İS.M.M.” eyni adamlara məxsusdur. Belə ki, “RASH.M.M.TRADE AND SERVICES-2020” (VÖEN 1303449481) MMC 26.11.2013-cü ildə yaradılıb. Nizamnamə kapitalı 406 939.00 manat olan şirkətin hüquqi ünvanı BƏRDƏ RAYONU, BƏRDƏ ŞƏHƏRİ, NİZAMİ, ev 115-də yerləşir. MMC-nin qanuni təmsilçisi Xudiyev Nadir Bilman oğludur.

Dövlət Vergi Xidmətinin hüquqi şəxslərin reyestrinə edilən dəyişiklikliklərdə MMC -nin ilk adı “RESHAD MME”, ilk hüquqi ünvanının BAKI ŞƏHƏRİ YASAMAL RAYONU, MEHMAN BÜNYADZADƏ, ev 251, mənzil 63 olduğu göstərilir. MMC-yə ayrı ayrı vaxtlarda bir neçə nəfər rəhbərlik edib. İlk qanuni təmsilçisi Sadıqov Ceyhun İsmayıl oğlu olub. Daha sonra Əliyev İsgəndər İsrafil oğlu, İsgəndərov Coşqun Fəxrəddin oğlu, İsgəndərova Şəhanə Əbülfət qızı MMC-yə müxtəlif vaxtlarda rəhbərlik ediblər.

Xudiyev Nadir Bilman oğlu həm də “İS.M.M.” (VÖEN 1400006201) Məhdud Məsuliyyətli Cəmiyyətinin qanuni təmsilçisidir. İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “İS.M.M.” MMC 2 aprel 2004-cü ildə qeydiyyata alınıb. Nizamnamə kapitalı 2 897 170 AZN olan şirkətin hüquqi ünvanı Bakı şəhəri Yasamal Rayonu, Əlövsət Quliyev küçəsi, ev 98, mənzil 15-də yerləşir.

MMC-nin ilk qanuni təmsilçisi Xudiyeva Mürvət Xıdır qızı olub. Onu Sadıqov Ceyhun İsmayıl oğlu əvəzləyib. Ceyhun Sadıqov 2023-cü ilə qədər “İS.M.M.” “MMC-ni təmsil edib.

“RASH.M.M.TRADE AND SERVICES-2020” MMC-nin digər qanuni təmsilçisi olmuş İsgəndərov Coşqun Fəxrəddin oğlu isə “ELVİ.M.M. SERVİCES GROUP” Məhdud Məsuliyyətli Cəmiyyətinin qanuni təmsilçisidir.

Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “ELVİ.M.M. SERVİCES GROUP” (VÖEN 1403580041) Məhdud Məsuliyyətli Cəmiyyətinin 11.11.2016-cı ildə 2 saylı Ərazi Vergilər Baş İdarəsində dövlət qeydiyyatına alındığı göstərilir. Nizamnamə kapitalı 834 127.00 manat olan şirkətin hüquqi ünvanı BAKI ŞƏHƏRİ NƏSİMİ RAYONU, AZADLIQ PR., ev 70, m. 168-də yerləşir.

Bu MMC-nin ilk qanuni təmsilçisi və yaxud təisçisi Həsənov Ülvi Dilqəm oğlu Yevlax rayonunda anadan olub. 2003-cü ildə Qafqaz Universitetinin Mühəndis iqtisadiyyatı və idarəetmə; Biznesin təşkili və idarəedilməsi fakültələrini bitiribr. Sərbəst auditor kimi fəaliyyətə başlamışdır. “Financial Academy Audit and Consulting” MMC-nin direktor-auditoru kimi fəaliyyətini davam etdirir.

MMC-nin ilk hüquqi ünvanı 22-ci ilin yanvarına qədər BAKI ŞƏHƏRİ NƏSİMİ RAYONU, ALI MUSTAFAYEV 3 MKR, ev 11, mənzil 92, həmin tarixdən 23-cü ilin dekabrına qədər BƏRDƏ RAYONU, BƏRDƏ ŞƏHƏRİ, NİZAMİ, ev 115 olmuşdur. Hansı ki, bu ünvanda “RASH.M.M.TRADE AND SERVICES-2020” MMC-də yerləşir.