Bakıda ustanın başını kəsib soyuducuya qoydular: Amansız qətlin TƏFƏRRÜATI!

Bakıda ustanın başını kəsib soyuducuya qoydular: Amansız qətlin TƏFƏRRÜATI

1998-ci il aprel ayında Bakı şəhəri S.Əsgərova küçəsi, 117 ünvanında yerləşən Bakı Balıq Hisləmə zavodunun 2 saylı sexində qətl hadisəsi olub. Zavodun hazır məhsullar anbarında olan soyuducuda ayaqları qapı tərəfə, başı əks istiqamətdə, qara rəngli polietilen torbada kişi meyiti aşkar edilib. Meyitə baxış zamanı məlum olub ki, qətlə yetirilən şəxs Masallı rayonunda anadan olan 1953-cü il təvəllüdlü Mübariz Rəsulovdur.

Azərforum Lent.az-a istinadən xəbər verir ki, Faktla bağlı həmin il avqust ayında Nəsimi rayon Prokurorluğunda şübhəli şəxs Elnur Abbasov barəsində köhnə Cinayət Məcəlləsinin 94-cü maddəsinin 6-cı hissəsi (xüsusi amansızlıqla qəsdən adam öldürmə), 109-cu (zorlama) maddəsi və hazırda qüvvədə olan 134-cü (öldürməklə hədələmə) maddəsi ilə cinayət işi açılıb. Ancaq E. Abbasov gizləndiyi üçün onu istintaqa təhvil vermək mümkün olmayıb.

2022-ci il fevralın 25-də Baş Prokurorluğun yaydığı məlumata görə, 2019-cu il fevralın 12-də Şirvan şəhər Polis Şöbəsindən daxil olan məktubdan görünüb ki, Rusiyanın Voloqda vilayəti üzrə İslah koloniyasında Yaşar Yaqubovdan izahat alınıb. İzahatda həmin şəxs başqa adla cəza çəkdiyini göstərib. Əsl ad-soyadı Elnur Abbasovdur. 1979-cu ildə Şirvan şəhərində anadan olub. 1998-ci ildə Bakıda qətl törədib. 2-3 ay Azərbaycanda gizlənib. Şirvanda bərbərxanada olanda 1983-cü il təvəllüdlü Yaqubov Yaşar Yaqubcan oğlunun adına doğum haqqında şəhadətnamə tapıb və sərhədi keçərək, Rusiya ərazisində yaşayıb. Həmin il cinayət işi üzrə icraat təzələnib. Məlum olub ki, 2017-ci ildə Elnur Abbasov Sankt-Peterburq şəhəri, Petroqrad rayon Məhkəməsinin 2020-ci il tarixli hökmü ilə RF CM-nin 162-ci (quldurluq) maddəsi ilə 5 il müddətinə azadlıqdan məhrum olunub.

İstintaq fotosu

2022-ci il fevralın 24-də Elnur Abbasov Rusiyadan Azərbaycana ekstradisiya edilib.

Lent.az qətl hadisəsinin istintaq materiallarını əldə edib.

İstintaqla müəyyən edilib ki, aprelin 22-də Elnur Abbasov qeyri-rəsmi mühafizəçi işlədiyi Balıq Hisləmə zavodunun 2 saylı sexində usta Mübariz Rəsulova, iş yerinə yüngül həyat tərzi keçirən qadınlar gətirdiyi üçün ona iradını bildirib. Aralarında yaranmış sözlü mübahisə əlbəyaxa davaya keçib. Mübariz Rəsulov masanın üzərindən götürdüyü bıçaqla Elnura yüngül dərəcəli xəsarət yetirdikdə, Elnur Abbasov otaqdan çıxıb, digər otağa qaçıb və ordan kustar üsulla hazırlanmış bıçağı götürüb. Arxasınca gələn Mübariz Rəsulovun qarın nahiyəsinə çoxsaylı zərbələr vuraraq, onu yerə yıxıb. Ardınca, yerdə uzanıqlı vəziyyətdə olan Rəsulovun döş və qarnına zərbələr endirib. Elnur Abbasov əlindəki bıçaq yerə düşəndə, Mübariz Rəsulovun əlindəki bıçağı götürərək, onun başına və üzünə xəsarətlər yetirib. Bu hərəkəti ilə zərərçəkmişi qəsdən, xüsusi amansızlıqla öldürüb. Daha sonra törətdiyi cinayətin izini gizlətmək məqsədilə hadisə yerini təmizləyərək, meyitini torbaya yerləşdirib və sexdəki soyuducuya qoyaraq, gizlədib.

Hadisə olan zavod

İş üzrə dindirilmiş Elnur Abbasov bildirib ki, 1998-ci ilin fevral ayında tanışı Anar Əliyevin vasitəsi ilə onun dayısı Mübariz Rəsulovun işlədiyi Balıq Hisləmə zavodunda mühafizəçi kimi çalışmağa başlayıb. Onun konkret iş saatı olmayıb, gün ərzində sexdə olub, gecə də orda otaqda qalıb:

“Mübariz Rəsulov yeyib içən, zarafatcıl insan idi. Aprelin 22-i səhər saat 11 radələrində darvazanı açanda Mübarizlə 30-35 yaşlı qadın sexə daxil olaraq, otağa keçdilər. 1 saatdan sonra Mübariz otaqdan çıxanda, ona hər dəfə zavoda bir qızla gəldiyini, ətrafda yaşayış evləri olduğunu və camaatın narazılıq etdiyini dedim. Mənim və sakinlərin ünvanına nalayiq ifadələr işlədəndə, mən də onu söydüm. Rəsulov üzərimə gələndə, cəld sağ əlimlə üzünə yumruqla vurdum. Mübariz otaqdakı bıçaq götürüb yuxarıdan aşağı zərbə vurmaq istəyəndə əlimi qabağa verdim və sol qolumdan xəsarət aldım. Otaqdan çıxıb qaçdım. Əlüzyuyanın yanında, balıq soymaq üçün istifadə olunan bıçağı götürdüm. Arxasınca əlində bıçaqla gələn Mübarizə tərəf çevrildim. Qarınına bir neçə dəfə zərbə vurdum. Onunla yanaşı yıxılaraq, zərbələr vurmaqda davam etdim. Yerdə süpürləşəndə Mübariz əlindəki bıçaqla sağ döş nahiyəmə xəsarət yetirdi. Mübarizin bıçaq olan əlindən tutdum, öz bıçağımla başına və boynuna çoxsaylı zərbələr endirdim”.

Hadisə olan ərazi

Hər ikisinin əlində olan bıçaqlar yerə düşüb. Mübarizin bıçağı Elnura yaxın olduğu üçün götürüb ona axırıncı zərbələri vurub:

“Qanın içində olan Mübarizin artıq öldüyünü gördüm. Sexdən əski parçaları tapıb yaramı sarıdım. Mübarizin meyitini torbaya salıb böyük soyuducuya qoydum və qapını bağladım. Mübarizlə gələn Mətanət adlı qadın uşaqlarının olmasını söyləyərək, onu öldürməməyimi xahiş etdi. Həmin qadını öldürmək fikrim yox idi. Ona heç kimə heç nə deməməsini tapşırdım. Sonra Mətanət sexdən çıxıb getdi. Qan olan yerləri yudum. Paltarımı dəyişdim, qanlı paltarlarımı zibil yeşiyinə atdım. Bıçaqları əlüzyuyanın yanına qoydum”.

Gecə saat 1 radələrində zavodun zəngi çalınıb. Qapını açanda Anar Gözəlovun gəldiyini görüb. Anar arada gecələr gəlib, onunla qalıb:

“Ona Mübarizi öldürməyimi danışaraq, meyitini zavoddan çıxarmaqda köməklik göstərməsini istədim. Amma Anar bundan imtina edərək, qorxusundan çıxıb getdi. Səhər saat 7 radələrində paltarlarımı yığıb, zavoddan çıxanda iş yoldaşım Mövlan Ağayev gəldi. Əli-Bayramlı şəhərinə yollandım. Ailə üzvlərimə adam öldürməyimlə bağlı heç nə demədim. Bir-iki gündən sonra Bakıya qayıtdım. Mübarizin meyiti hələ tapılmamışdı. Müstəntiqə onun itkin düşməsi ilə bağlı izahat verdim. Tanışlarımdan Anar Gözəlovun tutulduğunu eşidəndə qorxub yenidən Əli-Bayramlıya getdim. Həmin ilin iyun ayında orda xatırlamadığım kişi salonunda ad-soyadı Yaşar Yaqubova aid doğum haqqında şəhadətnamə tapdım. Qatarla Moskva şəhərinə getdi, orda Yaşar adlı şəxsin sənədi ilə yaşamağa başladım. Yaşar Yaqubovu heç vaxt görməmişəm”.

Elnur Abbasov əlavə edib ki, aprelin 22-də Mübariz Rəsulovun arvadı iş yerinə zəng edib, yoldaşını soruşub. O da Mübarizin zavoda gəlib-getdiyini deyib. Çünki Rəsulov həmin vaxt başqa otaqda qadınla olub və evdən zəng gəlsə, onun işdə olmadığını söyləməsini tapşırıb. Anar Gözəlov meyiti görməyib. Elnur ona təklif edib ki, benzin alıb cəsədi yandırsınlar. Lakin Anar onunla razılaşmayıb. E. Abbasov törətdiyi əməldən peşimandır.

İstintaq fotosu

Zərərçəkmiş şəxsin hüquqi varisi Sevil Rəsulova ifadəsində göstərib ki, 1990-cı ildə Mübariz Rəsulovla ailə həyatı qurub, nikahdan 2 övladları dünyaya gəlib:

“Ərim Bakı Balıq Hisləmə Zavodunda usta işləyirdi. 1998-ci il aprelin 22-də Mübariz saat 16 radələrində işə getdi. Həmin gündən də evə qayıtmadı. 2 dəfə iş yerinə zəng edəndə Elnur adlı mühafizəçi Mübarizin sexdə olmadığını bildirdi. Səhərisi gün zavoda zəng edəndə Mövlan adlı mühafizəçi yoldaşımın işə gəlmədiyini dedi. Aprelin 26-da Mübarizin bıçaq xəsarətləri olan meyiti işlədiyi sexin soyuducusunda aşkar edilib. Onun qətlinə görə tutulan Anar Gözəlov bir müddətdən sonra azad edilib. Mübariz hadisədən 10 gün əvvəl mal almaq üçün evdən 4000 dollar pul götürmüşdü. Evdən çıxan gün üzərində nə gədər pul olmasını dəqiq bilmirəm. Lakin barmağında qızıl üzüyü var idi. Ərimi Elnur Abbasov tək öldürməyib”.

Şahid Mətanət Səfərova ifadələsində göstərib ki, Mübariz Rəsulovla 1998-ci ilin aprel ayında tanış olub:

“Aprelin 22-də axşam şəhərdə görüşüb onun iş yerinə getdik. Otaqların birində onunla intim əlaqədə oldum. Çölə çıxıb yerdə qan ləkələrini görüb bərk qorxdum. Əlində bıçaq olan Elnur adlı mühafizəçi məni öldürəcəyini bildirəndə, uşaqlarımın şəklini göstərib, ona yalvardım. Həmin şəxsin mənə təqdim olunan Elnur Abbasov olmasını əminliklə söyləyə bilmirəm. Hadisədən uzun müddət keçdiyindən məni hədələyən şəxsin əlamətlərini xatırlamıram. Həmin gün Mübariz Rəsulovdan başqa heç kimlə cinsi əlaqədə olmamışam. Elnurun Mübarizi bıçaqla vurmasını görməmişəm”.

Şahid Anar Gözəlov bildirib ki, dostu Anar Əliyevin köməkliyi ilə onun dayısı Mübariz Rəsulovun işlədiyi zavodda fəhlə kimi çalışıb:

“O vaxt Bədən Tərbiyə İdman Akademiyasının 2-ci kursunda oxuyurdum. Saat 2-də dərslərim qurtarandan sonra işə gedirdim. Aprelin 22-də Elnur Abbasov Mübariz Rəsulovu öldürdüyünü deyib meyiti gizlətməkdə ona köməklik etməyimi xahiş etdi. Elnura məni bu işə qatmamasını, ən yaxşısı gedib polisə təslim olmasını bildirdim. Meyiti, həmçinin sexdə Mətanət adlı qadını görməmişəm. Qorxduğumdan çıxıb evə getdim. Bu barədə heç kimə heç nə demədim. 4-5 gündən sonra məni 21-ci bölməyə apardılar və orda ifadə verdim ki, guya Mübariz Rəsulovu mən qətlə yetirmişəm. Lakin istintaqda bu sübuta yetirilmədi. Cinayəti bilib gizlətməyimə görə məsuliyyətə cəlb olundum”.

Şahid Mövlan Ağayev bildirib ki, aprelin 24-də Mübariz Rəsulovun Təyyar və Yusif adlı dayıları işlədiyi zavoda gəlib, Mübarizin yoxa çıxdığını deyiblər:

“Bir müddətdən sonra 21-ci bölmənin əməkdaşları gələrək, əraziyə baxış keçirdilər. Qapı açarla bağlı olduğu üçün soyuducunun içinə baxa bilmədilər. Səhərisi gün Elnur Abbasov da yoxa çıxdı. Ayın 26-da polis əməkdaşları yenə də zavoda gələrək, soyuducunu açmaq lazım olduğunu bildirdilər. Köməkləşib, soyuducunun qıfılını kəsəndə, torbanın içində buzlanmış vəziyyətdə Mübarizin meyiti aşkar olundu”.

Bakı Ağır Cinayətlər Məhkəməsinin hökmü ilə cəzasını ciddi rejimli cəzaçəkmə müəssiəsində çəkməklə Elnur Abbasov 13 il müüddətinə azadlıqdan məhrum olunub.